السبت، 8 مايو 2010

كانت لنا أيام في قلبي ذكراها ...




كانت لنا ايام لا تنسى بمنتديات أسلي الولوفة تعرفنا خلالها على مجموعة طيبة من الاخوان من ضمنهم الراجل الجميل خفيف الظل ( هيثم عوض الله ) وهو عضو معانا الآن باسم (prince) .. وقد كانت بيننا مناوشات ومساجلات من ضمنها هذه القصيدة الهجائية .. ومناسبة القصيدة : في واحدة من اجازاتي للسودان استقبتنا مجموعة حلوة من ابناء اسلي الاعزاء بمطار الخرطوم وكان من ضمنهم المشاغب هيثم عوض الله وكان هذا هو اللقاء الاول بيننا .. بعد السلام الحار والتعارف .. انفرد بي الاخ هيثم عوض الله لتقديم هدية خاصة تعبيرا عن المعزة والمحبة .. فأخرج من تحت ملابسة ( مفراكة ) ليها ضل وقدمها وهو يكاد يموت من الضحك .. قبلت منو الهدية وكانت هديتي له هذه القصيدة


رد اعتبــــار

( بمناسـبـة مفراكـــة هيثــم عــوض الله )
اهــداء خاص للرائــع ( أبـو سـيــدة )

مـانـي أنــا البيـهــدوا لـيــهـــو مفــراكــــة
يا هيثومـي هـوي الليلي دابو القوس صحـى وجاكا
وشـوفـلك زول يفـكـك مني والله أدقــش فـي خـلاكا
وأهلـنـــا زمــــان :
قالــــوا الهيــّــن أحـقــربــو
وقـالـــوا الفـيكـــا بـدربــــو
واظنـك يــا أخويــا نـويـتَ تـفـضــح نفســك بـراكا
والشـي الحاصـل عليكـا يشاركوهــو الناس معـاكا
دحـيـــــــن أســمـــع :
واضـانــك لـــيّ أرخـيـهــا وافــتـح لـيـهــا شـبّـاكــا
أنا القوس البعرفو الناس وماب يختلفوا فيهو اتنين
أنـا القـوس البيطلـق سهمو ويدخـل جـوا ود العيـن
ويـومــو اليـلـعـب الكـنـكان الا يـجـرّهـا الخمـسـيـن
ويومـو اليعـزم الضيفـان يضبـح ليـهـو زي تـورين
مـركّـب مكـنـة النيـسـان وشايـقـيـاً لـسـانو سـنيـن
ويـومـو الينقـلـب زعلان يـجـر عـكـازو والسـكـيـن
تجيــب لـيْ ياخي مفــراكـــه ...!!!
وليـه ما جبـت برضــو معـاهـا مـرحـاكا
وقصـدك يعنـي مـا ناطانـي .. زي مـا مـاهـا نـاطاكا
عشـان بيهـا انضـرب فوق راسي وزيك ابقـى دعّاكا
والله بتـقصـــد شــنـــو ..!!
وهديتــك كـان لي منـــو ؟؟
ان حصـل الفـي راسـك ده .. جـداد حلتنـا مـا كاكـا
والــزول الـهــداك الـفـكـرة صـــدّق انـــو غـشـاكـا
انا القوس الحمارتو هميمـي ثابتـي وماهـا جكــاكا
انـا العميوقـة زولاَ مُـر .. سمعْلـك زول قِـــدر لاكـا
أنا الماسك الرسن دايماَ وشريكتي انا مـاها حنباكا
هدية رضية ...فاهماني ... رزينة وماهـا كوراكـا
وبي تهذيبا .. حاكماني ..مـوش فـي أيـدا مفراكـا
.......... وان فـــركـت ..........
بتفـرك ليـك حـروفـا كــلام يخـلّـي الدنـيـا ضحـاكـا
وان زعلت تكوسو رضاي تقول لي حبيبـة قسـاكـا
وانا باقيلا حارس القـون ..جناحـا وحربتـا وباكــا
أظنـك يومـي فاركنـك صباحـك وعصـرك ومسـاكـا
وزي الكـسـري عايسـنـك ونــار الـدوكـي صـالاكـا
ومــن اضنـيـك جـارنـك مدنـقـر ومـعـلـن رضـاكــا
يقولولك .. تقول حاضر ..تطنطن والخوف ملاكـا
ينادولـك تجـري حفـيـان كـأنـو فــي جـنّـي مسّـاكـا
والمفراكـة فـوق راسـك وشايـف الكمشـة جايـاكـا
تشوف الناس زي حلاتك .. ده ياهو مناكا ورجاكا
لكـن يـا أخويـا القـوس سماهـو بعيـد مــن سمـاكـا
لـي بحـرا غـريـق ( هيـثـوم ) مـنـو الــبالله وداكــا
صحيح انو المثل بيقول .. أذاكا يجيـك مـن أضاكـا
وليه الحق كان ( أبـو سيـدة ) مـن اضنيـك جراكـا
وليه الحـق كـان ( أبـو سيـدة ) كـال بالبنيـة أداكـا
وليـه الحـق كـان (أبـو سيـدة ) ندمـان انـو باراكـا
وشال حالك .. ونقر طارك ..وفوق الحيطة شرّاكا
( والقـارض ) كمـان معـذور اذا مـا فـات وخـلاكـا
تجيــب لـْي ياخــي مفــراكـــة ...!!!
وانــا الـقـوس البيـشـرب مـــن خـبــوب الـطـيـن
وانـــا الــقــوس الـبـيـاكـلَ الـبـصـلـة بالـتـركـيـن
وانا البيقفز التمرات .. وقارن الموية بالجيهتين
أنــــا أب شــنـب الـبــركــن فــوقـــو قـمـريـتـيـن
مـعـقــول مــافــي زول يــــوم عــنــي حـاكــاكــا
ولا عـن مرجلـة هالقـوس فكــرة بسيـطـة أداكــا
وقاليك انو هذا القوس يجيبو وشيـك فـي قفــاكـا
وقع والله مـا سمّيـت .. ولقيتلـك يـا دوب دواكـا
وعشان بس خاتر الطيبين بقولك يا زول كفـاكـا
بقيت زي ( كيس الرتينة ) كلامي هواهو حتاكا
وبدل هيثم دار أسميك أبو الفوق راســو مفراكـا

ليست هناك تعليقات:

إرسال تعليق